شهد هاشم السقا

بلغت من العمر 16 عامًا، قمة الأدب والأخلاق والذوق واللسان العسل والكل كان يشهد بأخلاقها وخجلها بالعيلة والمدرسة، استشهدت مع أخواتها عصام وعبد الرحمن في زيارة أمهم الأسبوعية يوم الخميس. بآخر الأشهر كانت ملتزمة بصيام النوافل بشكل مش طبيعي وبختمة القرآن والصدقات المخفية، وكانت دايماً تعاتب نفسها على كل شي تحسه ممكن يكون غلط، كل يوم كنت أصحى بالليل ع صوتها وهي بتصلي قيام الليل وتصحى متنكدة لو تأخرت عليها صلاة الفجر بموعدها، شهد بآخر آيامها كانت مجتهدة في الدراسة الإلكترونية وكل ما احكيلها لا تتعبي نفسك رح تترفعوا كلكم بالحرب ترد عليا وتحكيلي أنا بدرس جهاد في سبيل الله عشان وقتي رح أتحاسب عليه مش عشان علامات الدنيا. حنونة جداً وحساسة جدًا، كانت تخاف حد يزعل منها وتسعى تراضي الكل وتواسي الكل وتحنن عالكل بوازع ديني رهيب! استعدت للرحيل من بدري حبيبتي ، وواجهت ربنا بالوجه يلي هي كانت بتحبه.