Khalil Tamer Khalil AlAkka

خليل تامر خليل العكة هذه شهادة العم، يسطرها بصدق للتاريخ، وحتى يعرف العالم قسوة وحقارة الجيش الصهيوني: من 3 أيام مضوا وأبويا بيحفر بايديه الباطون والأنقاض أملا في العثور على ابنه الشاب تامر خليل العكة وزوجته هند حسونة وأولاده “تالا وزينب وخليل” لكن دون جدوى، تامر الشب الحلو الأسمراني… أنا وتامر على روس بعض كنا ناقر ونقير ولما كبرنا عقلنا، حبيبي أخويا تامر يالله كلنا بنعرف قديش هو قوي ونشيط وبحب الحركة، من لما قالوا انقصف كل المربع يلي متواجد فيه واحنا بنقول لااا أكيد أخويا عايش أخويا رح يطلع لحاله من الأنقاض، أخويا يااا ناس كل شي بعرف يعمل وبكل مكان الو فيه محبين وأصحاب، كل مكان وبيت بيفوته بيقلبه لمرح وفرح، أي بيت بفوته بتصير تطلع الأجهزة والأدوات المعطله حتى يصلحها بخبرته الي اكتسبها من تجاربه وبصلح أي شيء بدون أي مقابل، خدووم كل الناس بتطلب منه والعجيب انو دائما بعرف وبقدر يدبر حاله، دائما في اختراع جديد عامله بالبيت، والدرج الي حوله لجنينة خضرااا زي روحه، بس ليش هالمرة ما قدر يطلع لحاله ليش ما طلع يحكيلنا هيني “أنا اجيت نورت البيت” هيك كان متعود يحكي أول ما يفوت الدار ، وأي دار لأنو بكل الدور الو مطرح والو أكله، ونيالها الي بعجبه أكلها وبمدحه، تامر ذواااق مش أي أكل ولا لبس بعجبه، وبعمل من لاشيء شيء شيء، بس ليش يخو لهلقيت ما طلعت، احنا مش عاجزين وتامر قوي وأبويا الجبل مش عاجز أبويا عنده شركة مقاولات ومعدات.. ضل 40 سنة يشتغل ويعمر بهالبلد، بس مااا في وقود عشان يجرف المنطقة كلها ويطلع ابنه وأحفاده .. يااالله ترأف بأبويا وأمي وتصبرهم.. وينك يا تامر ليش ما طلعت .. أكيد انشغلت بأولادك حبايبك ما عرفت تنقذ مين ولا مين، وهو في حد بالدنيا بحب أولاده وبيدللهم قدك يخو؟؟ تعالو كلكم يلا يلا يخو حبيبي تعالو احنا ما فقدنا الأمل فيكم